कसले पढाइदेला नातिनी ?’
कार्तिक ३, २०७३- मिर्गौलाले काम नगरेपछि २६ वर्षको उमेरमा कविता थामीको ज्यान गयो ।
पैसा नभएकाले उपचार नपाई कविताको मृत्युपछि उनका दुई छोरी भूकम्पपीडित शिविरमा दु:खद दैनिकी काट्दै छन् । डेढ वर्षे संगीता ओछ्यान परिन् । त्यो बेला पनि ९ वर्षीया संगीता र ७ वर्षीया गौरीको स्याहारसुसार भएन । ज्यामी काम गरेर गुजारा गर्ने हीरा थामीले भएको सबै सम्पत्ति सकेर कवितालाई बचाउने कोसिस गरे । ‘पैसा पनि सकियो र कवितालाई पनि बचाउन सकिएन,’ हीराले भने ।
दुख्ने, पोल्नेजस्ता पीडाकै बीच कविता बितेपछि हीराको मन पनि अस्थिर छ । संगीता र गौरी अहिले हजुरआमा लालकुमारीसँग बस्छन् । दु:खी परिवार भएकाले दुई जना टुहुरा बालिका शिविरमा जसले जे दियो त्यही खाएर पेट भर्छन् । ‘किड्नीले आमा लगेको’ बताउने संगीता बाबु धनी भएको भए आमा बच्न सक्ने बताउँछिन् ।
भूकम्पपछि बस्ती खतरामा परेपछि बोसिम्पा र बुमाका ८४ परिवार जंगलछेउको टहरामा बस्छन् । बस्तीमा सबैको बिल्लीबाठ छ । दुई जना टुहुराको झनै दु:ख देखिन्छ । हजुरआमाको सहारा पाएका उनीहरूलाई खानकै समस्या छ । लाउने लुगा राम्रा छैनन् । पढ्नका लागि सामग्रीसमेत छैनन् । लालकुमारी भन्छिन्, ‘यिनीहरूलाई न राम्रो खान दिन सकिएको छ न कपडा किनिदिन सकिएको छ । स्कुल जान्छन् तर त्यसका लागि खर्चपर्च छैन । बिरामी हुँदा उपचार गर्ने पैसा हुँदैन् ।’
हजुरआमाको काखमा हुर्कंदै गरेका दुई बालिकाको भविष्य अन्योलग्रस्त छ । हुर्कंदै गएका उनीहरूका इच्छा शिविरमा रहेका अन्य बालबालिकाको जस्तै छ । उनीहरू पनि मीठो खाने, राम्रो लाउने, राम्रा किताब, कापी र कलम माग गर्छन् । आफ्नै बेहाल भएकाले नातिनीहरूको इच्छा पूरा गर्न नसकिएको हजुरआमा बताउँछिन् ।
अहिले हजुरआमा ६० वर्षकी भइन् । उनका पति काम गर्न सक्दैनन् । छोरा हीरा पत्नी बितेपछि बेकामेजस्तै छन् । मन लाग्दा ज्यामी काम गर्ने उनी सन्तान पाल्न सक्ने हैसियत राख्दैनन् । लालकुमारी भन्छिन्, ‘यी नानीहरूको माया लाग्छ, छाड्न मन लाग्दैन तर पालनपोषण गर्ने खर्च पनि छैन ।’
भूकम्पपछि बसाइएका बस्तीका सबै जना समस्यामा छन् । ८४ घरधुरीका मानिस बस्ने अस्थायी आवास भत्कने अवस्थामा छन्, जमिन टुङ्गो नलागेकाले उनीहरू पुनर्निर्माणअन्तर्गत घर बनाइहाल्ने अवस्थामा पनि छैनन् ।
अहिले संगीता ३ कक्षा र गौरी २ कक्षामा पढ्छन् । भूकम्पपीडितका लागि बनाइएका अस्थायी कक्षामा पढ्ने उनीहरूलाई माथिल्लो कक्षा पढाउन अप्ठेरो पर्ने हजुरआमा लालकुमारीले बताइन् । पालनपोषण र पढाइमा सहयोगको अपेक्षा राख्ने लालकुमारी भन्छिन्, ‘लालाबालालाई आफ्नो काखबाट छुटाउन भने सकिँदैन ।’
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon