ज्ञानेन्द्रको प्रश्नमा केपी ओलीको जवाफ- म दशैंका बेला भल छोप्न चाहन्न !
इतिहास सबैलाई थाहा छ, नेपाल अगाडि बढ्छ
असोज, काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले संविधान कार्यान्वयनमा सानातिना समस्याहरु टुंग्याएर अघि बढ्नुपर्ने बताएका छन् । साथै ओलीले पूर्वराजा ज्ञानेन्द्रले उठाएका प्रश्नहरुको जवाफ दिनेक्रममा दशैंका बेलामा आफूले कुनै ‘भल छोप्न नचाहने’ जवाफ दिएका छन् ।
भक्तपुरको बालकोटस्थित आफ्नै निवासमा शनिबार बिहान पत्रकारहरुसँग संक्षिप्त कुरा गर्दै एमाले अध्यक्ष ओलीको दशैंको अवसरमा आफूले कसैको विरोध वा समर्थनमा नबोल्ने बताए । उनले देशभित्र र बाहिर रहेका दशैं मान्ने सबै नेपालीहरुलाई शुभकामना व्यक्त ।
पूर्वराजा ज्ञानेन्द्रलाई जवाफ
शुक्रबार साँझ पूर्वराजा ज्ञानेन्द्रले दशैंको अवसरमा लिखित शुभकामना व्यक्त गर्दै विज्ञप्ति जारी गरेका थिए । सो विज्ञप्तिमा राजनीतिक दलहरुलाई प्रश्न गर्दै विगतका दशकमा जनताको पक्षमा के के काम भए ? भन्ने प्रश्न उठाइएको थियो ।
Close ad X
बालकोटमा शनिबार बिहान भएको जमघटमा एकजना पत्रकारले पूर्वप्रधानमन्त्री ओलीलाई प्रश्न गरे- ‘ज्ञानेन्द्रले उठाएका प्रश्नहरुबारे के भन्नुहुन्छ ?’
जवाफमा ओलीले भने- ‘म अहिले दशैंको शुभकामना व्यक्त गरिरहेका बेलामा, यस दशैंका बेलामा कुनै भल छोप्न चाहन्न । र, म कुनै कसैको विरोध वा समर्थन, कसैको पक्ष वा विपक्षको कुरा गर्न चाहन्न ।’
ओलीले पूर्वराजाको प्रश्नप्रति लक्षित गर्दै थपे- ‘नेपालको इतिहास हामी सबैलाई थाहा छ । हामी अगाडि बढ्छौं । नेपाल अगाडि बढ्छ ।’
‘तपाईले दशैंअघिको कुरो गर्नु भो’
पत्रकारसँग पूर्वप्रधानमन्त्री ओली करिब १० मिनेट प्रस्तुत भएका थिए । सुरुमा ६ मिनेट उनले दशैंको महत्वबारे प्रकाश पार्दै देश विदेशमा रहेका नेपालीलाई शुभकामना दिए । त्यसपछि थोरै राजनीतिक छनकयुक्त वाक्य बोल्दै उनले आफ्नो मन्तव्यको बिट मारे । त्यसपछि ४ मिनेटजति पत्रकारसँग सवाल-जवाफ भयो ।
मन्तव्यकै क्रममा पूर्वप्रधानमन्त्री अोलीले यसो भनिसकेका थिए- ‘हामीले अहिले समय सीमाभित्र गर्नुपर्ने केही कामहरु छन् । ती कामहरु समय सीमाभित्र हामी गर्न सकौं । संविधानको कार्यान्वयनमार्फत सानातिना समस्या छन् भने तिनलाई टुंग्याएर, संक्रमणकाललाई टुंग्याएर अब हामी ढीलो गर्न सक्दैनौं । तीव्रताका साथ आर्थिक उन्नतिको दिशामा, सम्वृद्धिको दिशामा अगाडि बढौं । हामी सबैलाई यस महान चाडले प्रेरणा प्रदान गरोस् भन्ने शुभकामना व्यक्त गर्न चाहन्छु ।’
प्रश्नोत्तरका क्रममा एकजना पत्रकारले ओलीलाई सोधे- ‘स्थानीय निकायको चुनाव संकटमा परेको हो ?’ ओलीबाट प्रश्नभन्दा छोटो जवाफ आयो- ‘हाम्रा समय सीमाभित्र गर्नुपर्ने कामहरु छन्, ती काम हामीले गम्भीरतापूर्वक टुंग्याउनुपर्छ ।’
फेरि अर्का सञ्चारकर्मीले सोधे- ‘स्थानीय तहको सीमांकनमा तीन दलवीच सहमति भएको छ, तर मधेसवादी दलहरुले त्यो सहमति मान्दिँन भनेर हिँडिराखेका छन् नि ? स्थानीय निकायको निवार्चन सम्भव देख्नुहुन्छ तपाई ?’
पूर्वप्रधानमन्त्रीले झन छोटो जवाफ दिए- ‘त्यो तपाईले भनेको दशैं अगाडिको कुरा हो ।’
तत्कालै अर्को प्रश्नको वाण बर्सियो- ‘दशैंको वीचमा के हुँदैछ ?’
ओलीले भने- ‘दशैंमा मैले कामना गरेको छु, सबै पार्टी एकठाउँमा…..’
टुंगिन्छ, टुंग्याउन सकिन्छ, टुंग्याउनुपर्छ !
एमाले अध्यक्ष ओलीले दशैंकै आसपास राजनीतिक समस्या समाधान हुने विश्वास व्यक्त गरे । संविधान संशोधन, स्थानीय तहको सीमांकन तथा संविधान कार्यान्वयन लगायउतका राजनीतिक समस्याबारे दलहरु विभाजित भइरहेका बेला ओलीको अभिव्यक्ति निकै नरम देखिएको थियो ।
ओलीलाई पत्रकारले प्रश्न गरे- तपाईले समय सीमाभित्र टुंग्याउने कामहरु टुंग्याउनुपर्छ भन्नुभयो, ती काम के हुन् र कसरी टुंगिएलान् ?
ओलीले भने- ‘टुंग्याउन खोज्दा केही पनि अप्ठ्यारो हुँदैन । टुंगिन्छ । टुंग्याउन सकिन्छ । टुंग्उयाउनुपर्छ ।’
बडादशैंबारे दुई शब्द
पूर्वप्रधानमन्त्री ओलीले समाजमा चाडबाड र संस्कृतिको महत्वबारे यसरी संक्षिप्तरुपमा शुभकामना मन्तव्य दिए-
‘नेपालभित्र रहनुभएका र विभिन्न कारणले नेपाल बाहिर रहनुभएका सम्पूर्ण नेपाली दाजुभाइ दिदीबहिनीहरु र बडादशैं पर्वलाई मनाउने सम्पूर्ण दाजुभाइ दिदीबहिनीहरु सबैमा बडादशैं २०७३ को अवसरमा म हार्दिक शुभकामना व्यक्त गर्न चाहन्छु । सबैको स्वास्थ्य राम्रो रहोस् र सबैमा सफलता प्राप्त होस् ।
हाम्रा चाडहरु यत्तिकै बनेका छैनन् । हाम्रो समाजको निर्माण, हाम्रो समाजको विकास सँगसँगै हाम्रो समाजको सुसम्बन्ध, सुव्यवस्थापन यी प्रयोजनहरुसँग, यस्ता उद्देश्यहरुसँग पनि हाम्रा चाडहरु जोडिएका छन् ।
विभिन्न चाडहरुका विभिन्न अर्थहरु छन् । महत्वहरु छन् । र, हाम्रा चाडहरुले सामाजिक सुसम्बन्ध एवं पारिवारिकदेखि लिएर नातासम्बन्धहरु र अरु कुराहरुलाई पनि अत्यन्तै सकारात्मक योगदान गरी आएको छ । यो चाड, खासगरी बडादशैं आफूभन्दा ठूलाहरुबाट आशिर्वाद लिने, ठूलाहरुलाई सम्मान गर्ने र सानाहरुलाई आशिर्वाद दिने कुरासँग सबभन्दा बढी घनिष्ट ढंगले जोडिएको छ ।
टाढा टाढादेखि आशिर्वाद लिन मान्यजनकहाँ जाने हाम्रो प्रचलन हो । यसले पुरानो पुस्ता, नयाँ पुस्ता, मान्यजन र नयाँ पिँढीका स्नेह गर्नुपर्नेहरुका वीचको आत्मीयतालाई प्रवल बनाएको छ । अरु चाडहरुले पनि यस्तै योगदान गरेका छन् । यी चाडहरु अर्थहीन छैनन् । र, यी चाड मनाउने प्रचलन हाम्रा सामाजिक सुमधुर सम्बन्ध, सुव्यवस्थापन जस्ता कुराहरुसँग घनिष्टरुपले गाँसिएर अर्थपूर्ण ढंगले बनेका छन् । म यस घडीमा सबैमा शुभकामना व्यक्त गर्न चाहन्छु ।
हामी यतिबेला एउटा संक्रमणकालीन अवस्थामा छौं । यस बडादशैंंबाट हामी सबैले हाम्रो विविधतायुक्त देश, विविधताले भरिएको देश बहुजाति, बहुभाषा र बहुसंस्कृतियुक्त देश र राष्ट्रिय एकता असाधारण ढंगले भएको देश, विविधताका वीचमा सुदृढ एकता सबल हुँदै जाओस् । र, हामी राष्ट्र निर्माणको महाअभियानमा तीब्रताका साथ अगाडि बढ्न सकौं ।
हामीले अहिले केही समय सीमाभित्र गर्नुपर्ने केही कामहरु छन् । ती कामहरु समय सीमाभित्र हामी गर्न सकौं । संविधानको कार्यान्वयनमार्फत सानातिना समस्या छन् भने तिनलाई टुंग्याएर, संक्रमणकाललाई टुंग्याएर अब हामी ढीलो गर्न सक्दैनौं । तीव्रताका साथ आर्थिक उन्नतिको दिशामा, सम्वृद्धिको दिशामा अगाडि बढौं । हामी सबैलाई यस महान चाडले प्रेरणा प्रदान गरोस् भन्ने शुभकामना व्यक्त गर्न चाहन्छु ।
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon