क्लार्कले जगाइदिएको उत्साह
भाद्र २५, २०७३- ३ दिनअघि अष्ट्रेलियाली क्रिकेट टिमका पूर्वकप्तान माइकल क्लार्कले समाजिक सञ्जालमा लेखे, ‘सुपर एक्साइटेड टु सी सन्दीप सुन’ म सन्दीपलाई चाँडै भेट्न एकदमै आतुर छु । सँगै उनले ह्यासट्याग दिंदै ‘ड्रिम बिग स्टार्ट नाउ’ ठूलो सपना अब सुरु हुन्छ भने लेखेका छन् । उनले वेष्टन डिस्ट्रिक क्रिकेट क्लबले सन्दीप लामिछानेका बारेमा जारी गरेको विज्ञप्ति समाजिक सञ्जालमा राखे ।
नेपालमा क्रिकेट राजनीतिक भूमरीमा अल्झिरहँदा विश्वकै उत्कृष्ट मध्येका खेलाडीले एक नेपाली युवालाई यहाँसम्म अवसर दिएको समाचार उनैले सार्वजनिक गरे । क्लार्कले उत्साहित समाजिक सञ्जालमा राखेको पोष्टमा विभिन्न प्रतिक्रिया आएका छन्, जसमा अष्ट्रेलियामा रहेका मात्र नभएर विश्वभरि रहेका नेपालीहरुले नेपाली क्रिकेट क्षेत्रमा नै उत्साह जगाइदिएकोमा धन्यवाद दिएका थिए । जसमा विशेषत: अष्ट्रेलियामा रहेका नेपालीहरुले उनलाई धन्यवाद दिंदै र आफ्नो देश र खेलाडीलाई अवसर दिएकोमा उनीप्रति आभार ब्यक्त गरेका थिए ।
क्लार्कले केही कमेन्टहरुको उत्तर फर्काउदै सन्दीप राम्रो खेलाडी भएको र आफु उनीसँग खेल्न उत्साहित रहेको बताएका छन् भने नेपाली क्रिकेटको सफलता र उन्नतीको कामना समेत गरेका छन् ।
साँच्चै भन्ने हो भने क्लार्कले नेपालजस्तो मुलुकको एक १६ बर्षे युवालाई आफ्नो एकेडेमीमा बोलाएर क्रिकेट सिक्ने र खेल्ने अवसर दिनु भनेको नेपाली युवा खेलाडीहरुलाई राम्रो खेलेमा अवसरको खाँचो छैन भन्ने प्रमाण पनि हो । झन् अर्कोतिर यसले खेलकै माध्यमबाट भए पनि विदेशमा रहेका र स्वदेशमै रहेका नेपाली युवाहरुलाई खेलतर्फ आकर्षित गरेको छ भने नेपालमा पनि अत्यन्तै प्रतिभावान युवा खेलाडीहरु छन भन्ने प्रमाण विश्वलाई दिएको तर्क गर्नेहरु समेत छन् ।
अष्ट्रेलियामा कुनैपनि नेपाली खेलाडीले यो स्तरको सम्मान र अवसर पाएको यो नै पहिलो हो । हुन त क्लार्क स्वयंमले समेत विज्ञप्तिमा यहाँको नेपाली समुदाय बलियो रहेको बताउँदै सन्दीपलाई हर किसिमको सहयोग नेपाली समुदायले पुरयाउने विश्वास राखेका छन् । आफ्नो मुक्तकण्ठले प्रशंसा गर्दै क्लार्कले सन्दीप आफ्नो खेलमा लगनशील भएको र अत्यन्तै प्रतिभावान भएको बताएका छन् । पछिल्लो समयमा नेपालका पूर्व राष्ट्रिय फुटबल खेलाडी जगजीत श्रेष्ठ मेलबर्नमा रहेको एक टिमबाट खेलिरहेका भएपनि त्यसबाहेक यो स्तरको अवसर यहाँ अहिलेसम्म कसैले पाएको थिएन् ।
‘विश्वका उत्कृष्टमध्येका एक खेलाडीले नेपाली युवालाई यसरी आफ्नो प्रतिष्ठित क्लबमा बोलाएर अवसर दिनु भनेको समग्र नेपाल र नेपालीको शिर उचो हुनु हो,’ गैर आवासीय नेपाली संघ अष्ट्रेलियाका उपाध्यक्ष दिनेश पोखरेल भन्छन् । उनी सन्दीपलाई एनआरएनको तर्फबाट गर्नसक्ने हर सहयोग उपलब्ध गराउन तयार रहेको समेत सुनाउँछन् । उनकै भनाइमा सन्दीपलाई नेपालबाट आफ्नो क्रिकेट क्लबमा बोलाएर अवसर दिनुले खेलमा लागेका नेपाली युवाहरुलाई खेलक्षेत्रमा लाग्न अझ प्रेरित गर्नेछ ।
अहिले एनआरएन पनि नेपालबाट यहाँ आएका र यहीं उत्पादन भएका नेपाली खेलाडीहरुलाई अवसर दिनका लागि खेलकुद कार्यक्रमहरु गर्न लागिपरेको छ । एनआरएन खेलकुद संयोजक नन्द गुरुङ आफूहरुको प्रयास पनि यहाँबाट अन्तर्राष्ट्रिय स्तरका नेपाली खेलाडीहरुको उत्पादन गर्नु रहेको बताउँछन् । उनी पनि नेपाली युवा सन्दीपले माइकल क्लार्क जस्तो खेलाडीको एकेडमीबाट खेल्न पाउनु अन्य नेपाली खेलाडीहरुका लागि बाटो प्रसस्त हुनु भएको दाबी गर्छन् । ‘यसले के प्रमाणित गरेको छ भने लगन र मेहनत गर्ने हो भने नेपाली खेलाडीहरुलाई समेत अवसरको खाँचो हुनेछैन् ।’
सन्दीपलाई स्वागत गर्न र उनले खेलेको क्रिकेट हेर्न यहाँको नेपाली समुदाय उत्साहित त छ नै त्योसँगै नेपालका अन्य युवा खेलाडीहरुले समेत विश्वभरिबाट यसरी नै अवसरहरु पाइरहुन् भन्ने सदासयता समेत ब्यापक छ । जे होस्, अष्ट्रेलियाका सफल कप्तानले एक नेपाली युवालाई यसरी उत्साहित भएर खेल्नका लागि अवसर दिनु र आफ्नो एकेडमीमा स्वागत गर्नुले यहाँका नेपालीहरुलाई समेत आफु नेपाली भएकोमा गर्व गर्ने स्थान प्रशस्त दिएको छ ।
खेलको माध्यमबाट नेपाली क्रिकेटले जुन स्थान अहिलेसम्म बनाइसकेको छ त्यसलाई नेपालका सत्ता सञ्चालकहरुको साथ रहने हो भने अहिलेसम्म निकै माथि पुगिसक्ने दाबी पहिल्यैदेखि गरिन्दै आएको छ । तर अहिलेसम्म पनि त्यो ब्यवहारमा परिवर्तन आएको छैन् । पछिल्ला दिनको समाचार हेर्ने हो भनेपनि क्यानको विवादमा सरकारमा रहेका दुई मुख्य दलका नेताहरुको राय बाझिएपछि आईसीसीका प्रमुख कार्यकारी अधिकृत अन्यौलमै बेलायत फकिंएको समाचारले खेलाडीहरुको मनोबल साह्रै उचो बनाएको छ भनेर दाबी गर्न सकिने अवस्था छैन् ।
निश्चल तिवारी नामका एक युवाले क्लार्कको यो सदासयता र विश्वासलाई फेसबुकमा दिएको धन्यवादलाई स्वीकार गर्दै क्लार्कले जवाफ दिदै भनेका छन् ‘म वास्तवमै सन्दीपसँग काम गर्न इच्छुक छु र आशा छ नेपाली क्रिकेटले अझ निरन्तर प्रगति गरिरहनेछ ।’ उनको यो प्रगतिको शुभकामना अहिले विवाद गरिरहेका नेपाली राजनीतिक दलका नेताहरुले सुने कि सुनेनन् होला !
प्रकाशित: भाद्र २५, २०७३
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon