दिनभर बैंकमा भिड, साँझपख होटल र पसलमा भिड
धादिङका भूकम्पपीडितलाई अनुदान वितरण
भूकम्पपीडितहरुले पहिलो किस्ता रकम लिन बैंक खाता खोल्दा भर्न झुम्मिएका सेम्जोङ गाविसका बासिन्दाहरु । खाता खोल्न बुझाउनु पर्ने विवरण फाराम बैंक कर्मचारीले भर्नुको साटो ग्राहकलाई नै जिम्मा लगाई दिए पछि फाराम भरेकै ५० रुपैयाा तिर्न बाध्य पारिएको छ । तस्बिर : हरिहरसिंह राठौर/कान्तिपुर तस्बिर : हरिहरसिंह राठौर/कान्तिपुर
भाद्र २८, २०७३- धादिङ सदरमुकामको बीच बजारमा रहेका आधा दर्जन बैंक वरपरका पसले र होटलहरुलाई यतिखेर भ्याइनभ्याई छ । मुख्य चोक र मिलनटोलमा रहेका एकदर्जन सस्ता होटल र नाश्ता पसल, मदिरा पसल र मोबाइल पसलहरुमा यतिखेर पाइला टेक्ने ठाउँ छैन । विभिन्न काममा सदरमुकाममै डेरा लिएर बसेका वा बसाई सराई गरी घर निर्माण गरेका व्यक्तिहरुकोमा पनि टन्नै आफन्तजनहरु पाहुना लागेका छन् ।
बजार चोकमा रहेका राष्ट्रिय वाणिज्य बैंक र एभरेष्ट बैंक, प्रभु बैंक, यती बैंक, हिमालयन बैंक, मेगा बैंकमा एकाबिहानैदेखि भूकम्पपीडितहरुको पहिलो किस्ता लिन लागेको ताँती साँझपख मात्रै सकिन्छ ।
दिनभर बैंकमा रकम बुझ्न लागेका ग्राहक साँझपख होटल, मोबाइल पसल, फेन्सी पसल, भाडाकुँडा पसलहरुमा देखिन्छन् । सरकारले ४५ दिन भित्र भूकम्पपीडितहरुलाई भत्केका घर पूनर्निर्माण गर्न पहिलो किस्ताको रकम दिने निर्णय गरे पछि रकम बुझेकाहरु निर्माण सामाग्री खरिदको साटो अन्य किनमेलमै व्यस्त छन् ।
भूकम्प पहिल्यै र भूकम्पपछि सदरमुकाममा संचालनमा सिमेन्ट, जस्तापाता, फलामे छड लगायतका निर्माण सामाग्री बेच्ने पसलहरुमा ग्राहक मुस्किलले फेला पर्छन् ।
‘पहिलो किस्ता बुझेर निर्माण सामाग्री खरिद गर्न कोही भूकम्पपीडित आएका छैनन्,’ पुछार बजार स्थित हार्डवेयर व्यापारी ध्रुव थापाले भने ।
‘घर पूनर्निर्माणकालागि सरकारले दिएको रकम लिनेहरुको लाइन त देखिन्छ, तर निर्माण सामाग्री खरिद गर्ने ग्राहक भने निकै कम छन्,’ पुछार बजारकै वसन्त ट्रेडर्सका संचालक वसन्त आचार्यले भने ।
‘अहिले निर्माण सामाग्री किनेर के गर्नु ? लैजाने बाटो छैन । सडक अवरुद्ध छ । बरु नजिकै आएको दशैंलाई सहयोग भयो,’ यती बैंकबाट ५० हजार रकम बुझेका झार्लांग–३ का ४६ वर्षीय यसु तामाङले भने, ‘२८ हजारको लत्ता कपडा किनें । २ दिनको होटल बसाईं, आउन जानमा १४ हजार खर्च भयो । ८ हजारले दशैंमा मासु किनिन्छ ।’
बैंकको सेवामा ढिलाई
भूकम्पपीडितलाई अनुदान वितरण गर्ने जिम्मेवारी र सेवा शुल्क पाएका बैंकहरुले कार्यालयमा ग्राहक राख्ने स्थान र कर्मचारीको अभाव देखाउादै सास्ती दिन थालेका छन् । सेवाग्राहीले खाता खोल्दा भर्नुपर्ने फाराम कर्मचारीले नभरेर अनुदान लिनेहरुलाई नै जिम्मा लगाएपछि सर्वसाधारण अलमलमा परेका छन् । उक्त बैंक खाता खोल्ने फारम भर्न भूकम्पपीडितहरुले ५० रुपैंया अतिरिक्त शल्क तिर्न बाध्य भएका छन् ।
‘कर्मचारी र सेवा दिने काउन्टर थप्न बैंकहरुले रकम समेत लिएका देखिएको छ । कर्मचारीको अभाव भनेर सेवाग्राहीलाई सास्ती दिन पाइन्न,’ स्थानीय विकास अधिकारी भगवान अर्यालले भने ।
अनुदान सम्झौताको काम नै सुरु भएन
सरकारले ४५ दिनभित्र पहिलो किस्ताको रकम भूकम्प प्रभावितलाई दिने घोषणा गरे पनि धादिङको एक गाविसमा अनुदान सम्झौताको काम पनि भएको छैन । धादिङको त्रिपुरेश्वर गाविसमा अनुदान सम्झौताको काम सुरु हुन नसक्दा ८ सय लाभग्राही मर्कामा परेका छन् । बूढीगण्डकी ले डुबानमा पार्ने त्रिपुरेश्वर गाविसका सचिवले अर्को गाविसको काम पनि गर्नुपर्ने भएकाले गर्दा काममा ढिलाई भएको हो ।
सबैले पहिलो किस्ताको रकम पाउने भनेपनि ४५ दिन बितिसक्दा जिल्लाका आधा लाभग्राहीले पनि नगद बुझ्न सकेका छैनन् । जिल्ला विकास समितिले कोष तथा लेखा नियन्त्रण कार्यालय मार्फत ३६ हजार ५ सय ४६ परिवारको खातामा पहिलो किस्ताको रकम पठाइएको छ ।
जिल्लामा ७० हजार ५ सय ८१ परिवार लाभग्राहीको सूचीमा छन् । अहिलेसम्म चैनपुर, थाक्रे र मैदी गाविसमा पनि अनुदानको रकम निकासा भएको छैन ।
प्रकाशित: भाद्र २८, २०७३
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon