भाद्र २५, २०७३- बेइजिङमा अब चिनियाँले रेस्टुरेन्टमा गएर मस्यौरा, गुन्द्रुक, ढिँडो, सिस्नोको खोले, साँधेको भटमास र फापरको रोटीलगायत नेपाली खानेकुरा खान पाउने भएका छन् । बेइजिङ सहरको उत्तरी भागमा रहेको प्रख्यात ओलम्पिक स्थल बर्डनेस्टको आडैमा चिनियाँ र नेपाली लगानीमा नेपाली परिकार पाक्ने नमस्ते रेस्टुरेन्ट आगामी असोज ६ बाट सञ्चालनमा आउने भएको छ ।
दुई करोड चिनियाँ युआनभन्दा बढी लगानी भएको रेस्टुरेन्टमा ७५ प्रतिशत चिनियाँ (तिब्बती) र २५ प्रतिशत नेपालीको लगानी रहेको छ । खानेकुरामा ७० प्रतिशत नेपाली र ३० प्रतिशत तिब्बती परिकार हुने रेस्टुरेन्टका प्रबन्ध निर्देशक ताइजस कक्षपतीले बताए ।
तिब्बती परिकार भए पनि चिनियाँ परिकारचाहिँ रेस्टुरेन्टमा पाइने छैन । रेस्टुरेन्ट बनाउन पाटनको कुमारी झ्याल, ढुंगेधारा, विभिन्न मन्दिरमा राखिएका घण्टीहरूलगायत इँटा पनि नेपालबाटै ल्याइएको छ । चिनियाँ सहयोगमा बनेको कारखानाले नेपालमा उत्पादन गरेको रातो चिल्लो इँटा, जसलाई काठमाडौंमा चाइनिज इँटा भनिन्छ त्यो पनि काठमाडौँबाट ल्याएर रेस्टुरेन्टको सजावट गरिएको छ । रेस्टुरेन्टको भित्री सजावटका रूपमा कुँदिएका काठ तथा ढुंगाका बुट्टाहरूले नेपालको झझल्को दिन्छ ।
रेस्टुरेन्टमा ठूलोसानो गरी २२ वटा हलहरू छन् । सानो हल ६ जनाको पारिवारिक खानाका लागि उपयुक्त छ भने मझौला जमघट गर्नका लागि २० जनासम्म अट्ने हल छ । खुल्ला रेस्टुरेन्ट १ सय ५६ जना अट्ने क्षमताको छ भने कफी सपमा ३० जना अटछन् । त्यसैगरी २४ जना अटाउने बार सिटिङ छ । ६० जना अटाउने एउटा हल छ । खुल्ला रेस्टुरेन्टसँगै सांस्कृतिक प्रस्तुति गर्न मिल्ने मञ्च पनि रहेको छ । रेस्टुरेन्ट पूरा सञ्चालन हुन थालेपछि ९२ जनाले रोजगारी पाउनेछन् । नेपालबाट २४ जना कामदार ल्याउने र बाँकी चिनियाँ कामदार राख्ने बताइएको छ ।
प्रकाशित: भाद्र २५, २०७३
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon