धनीका कुरा
भाद्र २५, २०७३- विश्वमा अर्बपतिहरूको संख्या १ हजार ८ सय १० जना रहेको छ । तिनीहरूको कुल सम्पति ६५ खर्ब (साढे छ ट्रिलियन) अमेरिकी डलर हुन आउँछ । यो अमेरिकी अखबार फोब्र्सले २०१६ फेब्रुअरी १२ सम्म सार्वजनिक गरेको तथ्यांक हो । अर्बपतिहरूको सूची हेर्दा कपडा उद्योग, खुद्रा व्यापार र खाद्य उद्योगबाट अर्बपति बनेकाहरूमा फ्रान्स, स्पेन र इटाली छन् । यसैगरी ऊर्जा र खनिज उद्योगबाट अर्बपति बनेकामा रसियनहरू र प्रविधि र फाइनान्स क्षेत्रमा लगानी गरेर सर्वाधिक धनाढ्य बनेकामा अमेरिकीहरू पर्छन् । अस्ट्रेलियाली वा ताइवानी अर्बपतिहरू विरासतमा पाएको धनबाहेक अन्य क्षेत्रबाट अर्बपति बन्ने कमै छन् ।
सिंगापुरका १७ अर्बपतिहरूमध्ये अधिकांश रियल इस्टेटबाट धनाढ्य बनेको तथ्यांकमा छ । नर्वे आफ्ना १३ जना अर्बपतिको कुल सम्पत्ति २४ दशमलव ८ अर्ब अमेरिकी डलरका साथ सर्वाधिक धनाढ्य विश्वका मुलुकहरूको २५ औं स्थानमा छ ।
अमेरिका भने यो सूचीमा पहिलो हो । त्यहाँ ५ सय ४० अर्बपतिको कुल सम्पत्ति २ दशमलव ३९९ ट्रिलियन अमेरिकी डलर रहेको छ । तीमध्ये अधिकांश आफ्नै व्यवसाय र उद्यमशीलताबाट अर्बपति बनेका छन् । त्यहाँका धेरैजसो अर्बपतिको सम्पत्तिको स्रोत प्रावधिक क्षेत्रमा गरिएको लगानी नै हो । त्यसैले विश्वकै सबैभन्दा बढी धनाढ्य बस्ने मुलुक बनेको हो अमेरिका । माइक्रोसफ्टका मालिक बिल गेट्स त्यहाँका मात्रै होइन विश्वकै सबैभन्दा धनाढ्य हुन् । यसैगरी विश्वकै सबैभन्दा बढी अर्बपति बस्ने दोस्रो मुलुक चीन हो । त्यहाँ २ सय ५१ जना अर्बपतिमध्ये अधिकांशको सम्पत्तिको स्रोत विभिन्न कारखानाबाट उत्पादित सामानहरू, प्रविधि र रियल स्टेट नै प्रमुख रहेका छन् । रियल इस्टेटको विकास गर्ने डालियन वान्दा समूहको सुरुवात गर्ने जियानलिन बेङ चीनका सबैभन्दा धनाढ्य व्यक्ति रहेको फोब्र्सले जनाएको छ । त्यहाँका अर्बपतिहरूको कुल सम्पत्ति ५ खर्ब ९३ अर्ब अमेरिकी डलर छ ।
सर्वाधिक अर्बपति उत्पादन गर्ने जर्मनी तेस्रो मुलुक हो । त्यहाँ १ सय २० अर्बपतिको कुल सम्पत्ति ४ सय ८९ दशमलव १ अर्ब अमेरिकी डलर छ । जर्मनीमा ३७ जना अर्बपति फेसन र रिटेल क्षेत्रबाट प्रतिनिधित्व गर्छन् । यसैगरी हेल्थकेयर क्षेत्रका १९ र म्यानुफ्याक्चरिङबाट १८ जना उद्यमी तथा व्यवसायी अर्बपतिमा सूचीकृत छन् । जर्मनीका सबैभन्दा धनाढ्यमा बिट हाइस्टर र कार्ल अलब्रेन्च हुन् । यिनीहरूले १९४६ मा आल्दी सुपर मार्केटको स्थापना गरेका थिए । त्यसैबाट अर्बपति बने । त्यस्तै विश्वका सबैभन्दा बढी अर्बपति भएकामा भारत चौथो स्थानमा छ । त्यहाँका ८४ जना अर्बपतिको कुल सम्पत्ति २ खर्ब ४८ दशमलव ४ अर्ब रहेको छ ।
अधिकांश भारतीय अर्बपतिहरू सेल्फ मेड हुन् । आफ्नै उद्योग, कलकारखाना र उद्यमबाट तिनीहरू अर्बपति बनेका छन् । अधिकांशको सम्पत्तिको मुख्य स्रोत फेसन, हेल्थ केयर, प्रविधिलगायत उद्योग र व्यवसाय नै हो । मुकेश अम्बानी भारतमै सबैभन्दा बढी सम्पत्ति भएका उद्यमी हुन् । यो सूचीको पाँचांै स्थानमा रुस छ । ७७ जना अर्बपतिको २ खर्ब ८२ दशमलव ६ अर्ब अमेरिकी सम्पत्ति रहेको छ ।
यहाँका अधिकांश अर्बपतिको मुख्य स्रोत ऊर्जा, खनिज उद्योगमा गरिएको लगानी नै हो । रुसका अर्बपतिको एक नम्बरमा लियोनिड मिखेल्सन रहेका छन् । हङकङ भने विश्वको सबैभन्दा बढी अर्बपति भएका १० मुलुकमध्ये छैठौं स्थानमा छ । त्यहाँका ६३ जना अर्बपतिको कुल सम्पत्ति २ सय ४० दशमलव २ अर्ब अमेरिकी डलर रहेको छ । त्यहाँ रियल इस्टेट, ग्याम्बलिङ र म्यानुफ्याक्टरिङ नै अर्बपति उत्पादन गर्ने प्रमुख स्रोत हो । लिका सिङ त्यहाँका सर्वाधिक धनाढ्य उद्यमी हुन् ।
त्यस्तै बेलायतमा ५० जना अर्बपतिका साथ ७ औं, इटाली ४३ अर्बपतिका ८ औं, फ्रान्स ३९ अर्बपतिका साथ ९औं र क्यानाडा ३३ अर्बपतिका साथ १०औं स्थानमा रहेका छन् ।
बेलायती अर्बपतिहरूको कुल सम्पत्ति १ सय ६१ दशमलव ८ अर्ब, इटालेलीको १ खर्ब ५० दशमलव ८ अर्ब, फ्रान्सको २ खर्ब १२ अर्ब र क्यानाडाको १ खर्ब १२ दशमलव ४ अर्ब अमेरिकी डलर रहेको छ । बेलायतमा सबैभन्दा बढी अर्बपति रियल इस्टेट फाइनान्ससँग सम्बन्धित छन् । हिन्दुजा परिवारका चार भाइ पूरै ग्रुपलाई आफ्नो नेतृत्व दिँदै आएका छन् । यिनै परिवार त्यहाँका सर्वाधिक धनाढ्यमा दरिएका छन् । जहाँसम्म इटालेली अर्बपतिहरूको कुरो छ, त्यहाँका अर्बपतिहरूद्वारा सञ्चालित व्यवसाय पूरै विश्वमा प्रख्यात छ । प्राडा, अरमानी, फरारी, बुल्गेरी, फरेरो वल्र्ड इटालेली लोकप्रिय ब्रान्ड हुन् । फरेरो ग्रुपका मालिक्नी मारिया फ्रान्का फिसोलो त्यहाँकी सबैभन्दा धनाढ्य हुन् ।
फ्रान्स फेसनका लागि परिचित छ । त्यसैले त्यहाँका अधिकांश अर्बपतिहरूको सम्पत्तिको मूल स्रोत फेसन नै भएको दाबी सञ्चार माध्यमहरूको छ । न्युज च्यानल, फेसन म्यानुफ्याक्चरिङ समूहहरूले फ्रान्समा अर्बपति उत्पादन गर्नमा महत्त्वपूर्ण योगदान दिँदै आएका छन् । क्यानाडामा भने आफ्नै लगन, परिश्रम र मिहिनेतबाट अर्बपति बनेकाहरूको संख्या बढी छ ।
त्यहाँ भारतमा जस्तै सेल्फ मेड अर्बपतिहरू रहेका छन् । उबर, लुलुलेमनलगायत कम्पनीको असल सञ्चालन र व्यवस्थापनका कारण अर्बपति त्यहाँ बढी बनेका हुन् । डेभिड थम्सन त्यहाँ सबैभन्दा धनी व्यक्ति हुन् । उनी सञ्चारमाध्यम र प्रकाशन कम्पनीका अध्यक्ष पनि हुन् । धेरै अर्बपति भएका अन्य देशहरूमध्ये स्विटजरल्यान्डमा ३२, ब्राजिल र दक्षिण कोरियामा ३१/३१, टर्कीमा ३०, स्विडेनमा २६, अस्ट्रेलिया र ताइवानमा २५/२५, स्पेनमा २१, इन्डोनेसियामा २०, जापानमा १७, थाइल्यान्डमा १६ र मेक्सिकोमा १४ जना रहेका छन् ।
(एजेन्सीहरूको सहयोगमा)
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon